Cymru 0 Y Ffindir 2

Mar 30 2009

Toshack ar fai am berfformiad Cymru

IE, yr un hen stori oedd hi efo tîm pêl-droed Cymru yn eu hymgyrch i gyrraedd rowndiau terfynol Cwpan y Byd. Colli gêm gartref y dylid fod wedi ei hennill.

Ychydig fisoedd yn ôl roedd pethau’n edrych yn dda i dîm John Toshack, a phawb yn ei ganmol am iddo roi cyfle i chwaraewyr ifanc flwyddyn neu ddwy ynghynt.

Ond ar ôl colli 0-2 ddydd Sadwrn yn erbyn Y Ffindir mae’n rhaid i’r rheolwr gymryd y rhan fwyaf o’r bai am berfformiad di-fflach ei dîm.

Roedd y tîm a’r tactegau’n rhy ofalus o’r hanner, yn enwedig ar ôl i Toshack gyfaddef bod rhaid i Gymru ennill y gêm hon i gael unrhyw obaith o fynd drwodd.

Sut gebyst mae o’n mynd i godi calonnau’r chwaraewyr rwan ar ôl dweud y fath beth?

Fe ddylai Toshack fod wedi dewis Aaron Ramsay o’r cychwyn, ond erbyn iddo ddod i’r cae roedd Cymru ar ei hôl hi, ac roedd hi’n rhy hwyr.